மதுரை மே.தொகுதி காங்கிரஸ் திமுக கூட்டணி வெற்றி

மதுரை மேற்குத் தொகுதியில் திமுக கூட்டணியின் சார்பில் போட்டியிட்ட காங்கிரஸ் வேட்பாளர் கே.எஸ்.கே. ராஜேந்திரன் சுமார் 31,000 வாக்குகள் வித்தியாசத்தில் அமோக வெற்றி பெற்றார். ராஜேந்திரன் பெற்ற வாக்குகள் 60,933. அவரை எதிர்த்துப் போட்டியிட்ட அதிமுக 29,818 வேட்பாளர் செல்லூர் ராஜூ வாக்குகள் பெற்றார். விஜய்காந்தின் தேமுதிக சார்பில் போட்டியிட்ட தேமுதிக வேட்பாளர் சிவமுத்துக்குமாரன் 21,272 வாக்குகளைப் பெற்றுள்ளார். இத் தொகுதிக்கு கடந்த 26ம் தேதி இடைத் தேர்தல் நடந்தது. இதில் பதிவான வாக்குகள் அடங்கிய மின்னணு இயந்திரங்கள் மதுரை மருத்துவக் கல்லூரியில் பலத்த பாதுகாப்புடன் வைக்கப்பட்டிருந்தன. வாக்குகளை எண்ணும் பணி இன்று காலை 8 மணிக்குத் தொடங்கியது. மருத்துவக் கல்லூரி வளாகத்தில் உள்ள மெயின் ஹாலில் வாக்கு எண்ணும் பணி நடந்தது. வாக்கு எண்ணிக்கையைத் தொடர்ந்து பலத்த பாதுகாப்பு போடப்பட்டிருந்தது. புகைப்படங்களுடன் கூடிய அடையாள அட்டையுடன் வந்த வேட்பாளர்களின் ஏஜென்டுகள் உள்ளே அனுமதிக்கப்பட்டனர். இத் தொகுதியில் மொத்தம் 1 லட்சத்து 56 ஆயிரத்து 182 வாக்காளர்கள் உள்ளனர். ஆண்களை விட பெண் வாக்காளர்களே அதிகம். இதில் 75 சதவீத வாக்குகள் பதிவாயின என்பது குறிப்பிடத்தக்கது

Thanks : Thats Tamil